जनकपुरधाम ।
रौतहटको चन्द्रपुर नगरपालिका ४ स्थित माछापुच्छ्रे बैंकबाट एक सेवाग्राहीको ९ लाख रुपैयाँ चोरी भएको छ ।
रौतहटकै वृन्दावन नगरपालिका ३ का रामेश्वर राय यादवको माछापुच्छ्रे बैंकमा रहेको खाता नम्बर ७५००६५३८३८०००१४ बाट रकम चोरी भएको हो । आइतबार चन्द्रपुर शाखामा चेक साट्न गएपछि उनले बैंक खाताबाटै रकम चोरी भएको थाहा पाए ।
यादवले बिहीबार मात्रै नेपाल बैंक लिमिटेडको तीन वटा चेक (१२ लाख २० हजार रुपैयाँ) आफ्नो खातामा क्लिरियन्सका लागि माछापुच्छ्रे बैंक चन्द्रपुर शाखामा दिएका थिए । खातामा रकम जम्मा भएको सन्देश पनि उनको मोबाइलमा गएको थियो ।
तर आइतबार ८ लाख रुपैयाँ खाताबाट झिक्न चन्द्रपुर शाखामा पुगेका उनलाई कर्मचारीले खातामा मात्र ३ लाख २० हजार रुपैयाँ रहेको बताएपछि उनको पैसा बैंकबाटै चोरी भएको थाहा पाएका हुन् ।
सेवाग्राही यादवले जम्मा गरेको रकम खातामा नरहेको थाहा पाएपछि तत्कालै शाखा प्रबन्धक रामजी दासलाई भेटेकोमा उनले गैरजिम्मेवार जवाफ दिएको उनले गुनासो गरेका छन् ।
यसबारे प्रहरीले अनुसन्धान थालेको बताइएको छ ।
यस प्रति तपाइको धारणा के छ ?