काठमाडौँ ।
भुटानी शरणार्थीको कोटामा अमेरिका पठाउने नाममा ठग्ने गिरोहको अनुसन्धान अन्तिम चरणमा पुगेको प्रहरीले जनाएको छ ।
जिल्ला प्रहरी परिसर काठमाडौँले आइतबार सरकारी वकिल कार्यालयमा अनुसन्धान प्रतिवेदन बुझाउने तयारी गरेको छ । अनुसन्धानमा संलग्न अधिकृतका अनुसार प्रहरीले ३ वटा कसुरमा सजाय गर्न मागदावी लिनुपर्ने राय सरकारी वकिललाई दिँदै छ ।
राष्ट्र हित प्रतिकुलको कसुर, ठगी र किर्ते सम्बन्धी कसुरमा अधिकतम सजाय हुनुपर्ने मागदावी लिएर अदालतमा मुद्दा लैजान राय सहितको अनुसन्धान प्रतिवेदन बुझाउने तयारी भइरहेको बताइएको छ ।
सङ्गठित अपराध निवारण ऐन २०७० को दफा ९ अनुसार अभियोजन गर्दा सरकारी वकिलले सबै कसुरमा थप ५० प्रतिशत सजाय मागदावी लिन सक्छन् । ३ वटा कसुर र सङ्गठित अपराध अन्तर्गत थप सजायसहित साढे २८ वर्ष कैद माग्ने गरी अनुसन्धान प्रतिवेदन तयार भइरहेको जिल्ला प्रहरी परिसर स्रोतले बताएको छ ।
३ वटा कसुरसँगै ‘सङ्गठित अपराध’ र ‘एकीकृत कसुर’ बापत थप सजायको मागदावी गर्नुपर्ने प्रहरीको जिकिर छ । मुलुकी अपराध संहिता ०७४ को दफा ५१ अनुसार राज्य विरुद्धको कसुर अन्तर्गत ‘राष्ट्र हित प्रतिकुलको कसुर’ पर्छ । राष्ट्र हित प्रतिकुलको कसुरमा ५ वर्षसम्म कैद र ५० हजार सम्म जरिवाना हुने व्यवस्था छ ।
मुलुकी अपराध संहिता २०७४ को दफा २४९ अनुसार ठगी मुद्दामा ७ वर्ष सम्म कैद र ७० हजारसम्म जरिवाना हुने व्यवस्था छ । सरकारी छाप दस्तखत किर्ते मुद्दामा ७ वर्षसम्म कैद र ७० हजारसम्म जरिवाना हुने व्यवस्था छ ।
एकीकृत कसुरबापत थप सजाय गर्दा सबैभन्दा बढी सजाय हुने कसुरको बराबर र त्यसभन्दा थोरै सजाय हुने कसुरमा आधा सजाय हुने व्यवस्था छ । एकीकृत कसुर बापत ठगीमा ७ वर्ष, किर्तेमा साढे ३ वर्ष र राष्ट्र हित प्रतिकूलको कसुरमा साढे २ वर्ष गरेर १३ वर्ष कैद सजाय हुन सक्ने व्यवस्था छ ।
यस प्रति तपाइको धारणा के छ ?