पोखरा ।
गण्डकी प्रदेशसभा स्थापना भएको ५ वर्ष पुरा भएको छ । स्थापना दिवशको अवसरमा प्रदेशसभा भवन परिषरमा आयोजित कार्यक्रममा मुख्यमन्त्री, मन्त्री र प्रमुख प्रतिपक्षी दलका नेतासहित पूर्व मुख्यमन्त्री र पूर्वसभामुख समेतले संघ सरकारले प्रदेशलाई अधिकार नदिएर प्रदेश संरचना माथि नै प्रश्न खडा गर्ने ठाउँमा ल्याइपु¥याएको टिप्पणी गरेका छन् ।
गण्डकी प्रदेशका मुख्यमन्त्री खगराज अधिकारीे जवसम्म केन्द्र सरकारले प्रदेशका सबै अधिकार दिँदैन तवसम्म केन्द्र सरकार सत्ता पक्ष र प्रदेश सरकार प्रतिपक्षीको रुपमा रहने बताए । उनले अधिकार प्राप्तिका लागि द्वन्द्व भन्दापनि सहकार्य गरेर अगाडि बढ्ने धारणा राखे । ‘अधिकार प्राप्ति गर्न प्रतिस्पर्धा गरेर वा विरोध गरेर होइन, संघसंग सहकार्य गरेर नै अगाडि बढ्ने हो । यहाँहरुले भनेजस्तै जवसम्म प्रदेशका अधिकार सम्पूर्ण रुपमा प्राप्त हुँदैनन् तवसम्म संघ सरकार सत्ता पक्ष र हामी प्रतिपक्षी रहहिरहन्छौं’ उनले भने । मुख्यमन्त्री अधिकारीले प्रदेशको औचित्य स्थापित गरेरै छाडिने दृढता समेत व्यक्त गरेका छन् ।
निवर्तमान मुख्यमन्त्री कृष्णचन्द्र नेपाली पोखरेलले संघ सरकारले संविधान अनुरुप दिनुपर्ने अधिकार नदिँदा समस्या रहेको बताए । गण्डकी प्रदेशमा विपक्षी दलका नेता सुरेन्द्र पाण्डेले संविधानले सुरक्षित गरेको गणतन्त्र, संघीयता र समावेशिता लगायतका परिवर्तनलाई उल्ट्याउन खोज्ने र व्यवस्थाकै विरोध गर्नेहरुसंगको गठजोडले संविधान र व्यवस्थाको रक्षा गर्न सक्छ कि सक्दैन भन्ने प्रश्न खडा गरेको तर्क गरे ।
नेकपा माओवादी केन्द्र संसदीय दलका नेता भौतिक पूर्वाधार तथा यातायत व्यवस्था मन्त्री हरिबहादुर चुमानले प्रदेशले पाँच बर्षमा जनतामा आसा जगाउने काम गरेको धारणा राखे । उनले संघीयता र परिवर्तन विरोधीहरुले नियतबस गलत व्याख्या गरेको उनको भनाई छ । उनले संघले अधिकार नदिँदा प्रदेशमा समस्या रहेको धारणा राखे ।
राप्रपा संसदीय दलका नेता एवं समाजिक विकास तथा स्वास्थ्य मन्त्री पन्चराम गुरुङले परिवर्तन बोलीमा होइन व्यवहारमा ल्याउनुपर्ने चुनौती रहेको बताए । आफूहरु व्यवस्थाको विरोधी रहेको चर्चा गरेका उनले सहिढंगले काम गरेर नागरिकले पनि ठिक भन्ने परिस्थितीमा आफूहरुले पनि सोच्ने धारणा राखे । उनले अहिले सिद्धान्त र वाद भन्दापनि आफूहरुको चाहना विकास र संबृद्धि रहेको बताए । त्यसका लागि सबै एकतावद्ध भएर अगाडि बढ्नुपर्ने उनको भनाई थियो ।
सभामुख कृष्णप्रसाद धितालको अध्यक्षतामा भएको कार्यक्रममा उपसभामुख मिना थापा, उच्च अदालत पोखराका प्रमुख न्यायाधिस डिल्लीराज आचार्य र प्रदेशसभाका सचिव हरिराज पोखरेलले पनि बोलेका थिए ।
यस प्रति तपाइको धारणा के छ ?