पोखरा ।
राष्ट्रिय स्वतन्त्र पार्टी (रास्वपा)ले सरकारबाट बाहिरिने निर्णय गरेको छ । केन्द्रीय सदस्य र सांसदहरुको संयुक्त बैठकले सरकार छाड्ने निर्णय गरेको हो ।
सरकारलाई दिएको समर्थन भने कायमै राख्ने निर्णय भएको रास्वपाका सांसद डा. ढाकाकुमार श्रेष्ठले जानकारी दिए । ‘अहिलेलाई सरबारबाट बाहिरिने निर्णय भयो । सरकारलाई भने हाम्रो समर्थन यथावत रहन्छ । पछि परिस्थिति हेरेर अगाडि बढ्ने छौं’ रास्वपा गण्डकी प्रदेशका सभापति समेत रहेका सांसद श्रेष्ठले भने ।
रास्वपाबाट डोलप्रसाद अर्याल श्रममन्त्री, शिशिर खनाल शिक्षामन्त्री र डा. तोसिमा कार्की स्वास्थ्यराज्यमन्त्री छन् । रास्वपा सभापति रवि लामिछाने उपप्रधान तथ गृहमन्त्री थिए । तर नागरिकता मुद्दामा १३ माघमा सर्वोच्च अदालतले सांसद पद खारेज गरेपछि उनी पदमुक्त भए ।
नेपाली नागरिकता लिएपछि उनी उपप्रधान तथा गृहमन्त्रीमा फर्किन चाहेका थिए । तर लगातार सम्वाद गर्दा पनि प्रधानमन्त्री पुष्पकमल दाहाल प्रचण्ड गृह मन्त्रालय दिन तयार नभएपछि रास्वपाले सरकार नै छाड्ने निर्णय गरेको हो । अहिले पत्रकार भेटघाट कार्यक्रम गरेर रास्वपाका सभापति लामिछानेले पार्टीले गरेको निर्णय र परिस्थितिको बारेमा जानकारी गराइरहेका छन् ।
यस प्रति तपाइको धारणा के छ ?