पोखरा ।
पोखरा महानगरले गोलघरमा डोजर चलाएको छ । विगतमा जिल्ला ट्राफिक प्रहरी कार्यालय बसेको उक्त स्थानमा महानगरले पोखरा घर बनाउने योजनासहित सम्याउन डोजर चालाएको हो । करिव २ रोपनी जग्गा रहेको उक्त स्थानमा जिल्ला ट्राफिक प्रहरी कार्यालय बस्नु अगाडि बसको टिकट काउण्टर रहेको थियो ।
हाल जिल्ला ट्राफिक प्रहरी कार्यालय आफ्नै भवन बनाएर सरिसकेको छ । आफ्नै भवनमा सरेको भएपनि प्रहरीले उक्त स्थान छाड्न भने मानेको थिएन । पोखराको महेन्द्र पुलमा रहेको पोखरा आर्ट ग्यालरी सहितका सटहरुमा डोजर चल्दा नै पोखरा महानगरका प्रमुख धनराज आचार्यले सौन्दर्यकरण र व्यवस्थित गर्ने गरी पोखरा घर बनाउने पोखरा आर्ट ग्यालरी र पुस्तकालयलाई पृथ्वी चोकमा बन्ने पोखरा भवनमा व्यवस्थापन गरिने बताएका थिए । सोही प्रयोजनका लागि उक्त स्थानमा डोजर लगाइएको पोखरा महानगर वडा नम्बर ९ का वडाध्यक्ष दीपेन्द्र मर्सानीले जानकारी दिए ।
पोखरा महानगरले उक्त स्थानमा पोखरा घर बनाउनका लागि २ करोड रुपैयाँ बिनियोजन नै गरेको छ । आर्ट ग्यालरी, घण्टाघर, पुस्ताकालय, पोखरा आउदा आकर्षक देखिने गरी सूचना केन्द्र पनि उक्त घरमा रहनेछ । उक्त भवन दुइवर्ष भित्र बनाउने वडाध्यक्ष मर्सानीले जानकारी दिए ।
मर्सानीका अनुसार उक्त भवनको त्यसको भुईँ तलामा सुचना केन्द्र हुन्छ, बिचको तलामा पुस्तकालय हुन्छ, त्यो भन्दा माथि आर्ट ग्यालरी हुन्छ र त्यो भन्दा माथि घण्टाघर हुन्छ । उक्त स्थानमा पार्किङ र सुन्दर बगैँचा सहितको खुला स्थान निमार्ण गरिने उनले बताए ।
यस प्रति तपाइको धारणा के छ ?