पोखरा ।
आजदेखि पोखरा रंगशाखामा आहा–रारा पोखरा गोल्ड कपको २२ औं संस्करण सुरु हुँदैछ । आयोजक सहारा क्लब र धरान फुटबल क्लबबीचको उद्घाटन खेल हुने आयोजक सहरा क्लवले जानकारी दिएको छ । यसपालि १० टिम प्रतिस्पर्धामा छन् ।
२२ औं संस्करणको गोल्ड कपमा सहारासहित धरान फुटबल क्लब, मनाङ मर्स्याङ्दी क्लब, मछिन्द्र फुटबल क्लब, चर्च ब्वाइज युनाइटेड क्लब, भुटानिज युथ स्पोर्ट्स क्लब मिनेसोटा (अमेरिका), संकटा क्लब र विभागीय तीन टिम एपीएफ, आर्मी र पुलिसले प्रतिस्पर्धा गर्दै छन् ।
१५ पुसमा नेपाल पुलिस र चर्च ब्वाइज, १६ पुसमा धरान र सहाराबीचको विजेतासँग एपीएफले क्वाटरफाइनल खेल्ने छ । १७ पुसमा पुलिस र चर्च ब्वाइजबीचको खेलको विजेतासँग मछिन्द्रले क्वाटरफाइनलमा भिड्ने छ ।
तेस्रो क्वाटरफाइनल खेल १८ पुसमा आर्मी र संकटा क्लबबीच हुनेछ । चौथो क्वाटरफाइनलमा १९ पुसमा मनाङ र भुटानी क्लबबीच प्रतिस्पर्धा हुनेछ । २० पुस र २१ पुसमा सेमिफाइनल हुनेछ । २३ पुसमा फाइनल हुनेछ ।
०५८ सालमा भएको क्याराभान गोल्डकपलाई गणना गर्दै यसपालि २२ औं संस्करणबाट नामांकित गरिएको हो । क्लबका महासचिव रामजीप्रसाद अधिकारीले बचत रकम क्लबबाट सञ्चालित सूर्यबहादुर केसी स्मृति सहारा फुटबल एकेडेमीमा खर्च गर्ने बताए । उनका अनुसार हाल तेस्रो ब्याचको एकेडेमीमा १० जिल्लाका १३ प्रशिक्षार्थी छन् । उक्त एकेडेमीको स्रोत नै फुटबल प्रतियोगिता रहेको छ ।
प्रतियोगिताबाट १ करोड ५९ लाख ५० हजार रुपैयाँ आम्दानी र १ करोड १३ लाख ५६ हजार रुपैयाँ खर्च हुने अनुमान गरिएको छ । विजेताले १२ लाख रुपैयाँ पाउने छ । यस वर्ष अघिल्लोमा भन्दा २ लाख रुपैयाँ थप गरिएको हो । अघिल्लो वर्ष उपविजेताले ५ लाख पाउने गरेकोमा यस वर्ष ६ लाख रुपैयाँ प्राप्त गर्ने छ । उत्कृष्ट ५ विधामा र सर्वाधिक गोलकर्ताले २५–२५ हजार रुपैयाँ पाउने छन् । प्रत्येक खेलको म्यान अफ दी म्याचले ८ हजार र फाइनलमा १० हजार रुपैयाँ पाउने छन् ।
यस प्रतियोगितालाई पहिलो संस्करणदेखि नै मुख्य प्रायोजकको रुपमा हिमश्री फुड्स प्रा.लि. को उत्पादन आहा तथा रारा तयारी चाउचाउले गरिरहेको छ । थप १० वर्ष प्रायोजन गर्ने सम्झौता हालै सहारा क्लब र हिमश्री फुड्सबीच भएको छ । उक्त सम्झौतासँगै यसपल्ट प्रतियोगिताको नाममा आहा–रारासँगै पोखरा थपिएको हो ।
यस प्रति तपाइको धारणा के छ ?