भैरहवा ।
अन्तरकलेज जिल्लास्तरीय ‘साई ग्लोबल कप–२०७९’ टी–२० क्रिकेट प्रतियोगिता अन्तर्गत मंगलबार भएका दुई खेलमा शान्ति नमूना उच्च मावि र साईग्लोबल एकेडेमी ‘बी’ विजयी भएका छन् । शान्ति नमूनाले लुम्बिनी इन्जिनियरिङ कलेजलाई १५ रनले र साई ग्लोबलले होराइजन जीबीएसलाई १ रनले पराजित गर्दै जित निकालेका हो ।
भैरहवास्थित सिद्धार्थ रंगशालामा भएको पहिलो खेलमा टस जितेर ब्याटिङ गरेको शान्ति नमूनाले ४ विकेटको नोक्सानीमा ७० रनको योगफल बनायो । मौसमका कारण १० ओभरमा छोट्याइएको उक्त खेलमा शान्ति नमूनाका लागि स्वस्तिक पराजुलीले नटआउट २७, राजीज खड्काले ११ र जय गोदारले ९ रनको योगदान दिए । बलिङमा लुम्बिनी इन्जिनियरिङका सरोज भुसाल, विजय बस्नेत र राजन खत्रीले समान १–१ विकेट लिए ।
जवाफी ब्याटिङ गरेको लुम्बिनी ८ विकेटको नोक्सानीमा ५५ रनमै समेटियो । उसका लागि विजय बस्नेत र सचिन देवकोटाले समान १५–१५ रन बनाए । बलिङमा उसलाई सस्तैम रोक्न शान्ति नमूनाका जय गोदार र कुशल बेल्बासेले समान २–२ तथा सागर भण्डारीले १ विकेट लिए । शान्ति नमूनाका जय गोदार म्यान अफ द म्याच भई पुरस्कृत भए ।
यस्तै दोस्रो खेलमा टस जितेर ब्याटिङ गरेको साई ग्लोबलले निर्धारित २० ओभरको खेलमा १९ ओभर खेल्दै सबै विकेट गुमाएर १ सय १६ रनको योगफल बनायो । उसका लागि इमरान खानले ४३, मोहम्मद हुसेनले २२ र प्रवेश थापाले १० रन बनाए । बलिङमा होराइजनका राहुल प्रजापतीले ३, तबरोज खान र सुभम खनालले समान २–२ विकेट लिए ।
प्रतिउत्तरमा होराइजनले ७ विकेटको क्षतिमा १ सय १५ रन मात्रै बनाउन सक्यो र एक रनले हार ब्यहोर्यो । उसका लागि बाबुराम क्षेत्रीले २३, सचिन थापाले २१ र सन्तोष साउदले ११ रन बनाए । बलिङमा साई ग्लोबल ‘बी’ का सामोत पौडेल, जय प्रताप र मिर्नाल गुरुङले समान २–२ विकेट लिए । साई ग्लोबलका सामोत पौडेल म्यान अफ द म्याच भई पुरस्कृत भए ।
रुपन्देही क्रिकेट संघको आयोजनामा जारी प्रतियोगिता पुस १६ गतेसम्म चल्नेछ । प्रतियोगितामा रुपन्देहीका निजी तथा सामुदायिक गरी २० वटा कलेजको सहभागिता छ । प्रतियोगितामा बिजेताले ४० हजार रुपैयाँ र ट्रफी तथा उपबिजेताले २० हजार रुपैयाँ र ट्रफी प्राप्त गर्नेछन् । त्यसैगरी म्यान अफ द सिरिजले ५ हजार रुपैयाँ, बेष्ट ब्याटर तथा बेष्ट बलरले जनही २ हजार ५ सय तथा प्रत्येक दिनको म्यान अफ द म्याचलाई १ हजार रुपैयाँले पुरस्कृत गरिने संघका सचिव संजय गुरुङले जानकारी दिए । यस्तै, प्रतियोगितामा अनुशासित एक टिमलाई समेत पुरस्कृत गरिने आयोजकले जनाएका छन् । प्रतियोगितालाई साईग्लोबल एकेडेमीले मुख्य प्रायोजन गरेको छ ।
यस प्रति तपाइको धारणा के छ ?