काठमाडौं ।
भक्तपुरमा ट्याटु खोपाउन गएका एक युवकको मृत्यु भएको छ।
बुधबारराती ट्याटु हान्न गएका मध्यपुरथिमी नगरपालिका १ लोकन्थली घर भई काठमाडौंको कोटेश्वर बस्ने ३३ वर्षीय बिराज खड्काको मृत्यु भएको महानगरीय प्रहरी परिसर भक्तपुरले जनाएको छ।
उनी गएराति साढे ९ बजे लोकन्थली मनहरा आँखा अस्पताल नजिकै रहेको आरूष मल्लले सञ्चालन गरेको इन्क ट्याटुमा ट्याटु खोपाउन गएका थिए। ट्याटु हान्नेहरुको भिड रहेकाले उनी आफ्नो पालो कुरिरहेका थिए ।
उनी पालो कुरिरहेको बेला बेहोस भएका थिए । बेहोस भएका खड्कालाई अस्पताल पुर्याएकोमा राती १२ बजे उपचारको क्रममा मृत्यु भएको थियो ।
उनको मृत्युको कारण अहिले नै खुलिसकेको छैन। पोष्टमार्टमको लागि अस्पताल लगिएको छ। रिपोर्ट आएपछि थाहा हुने प्रहरीले जनाएको छ।
प्रहरीले घटनासम्बन्धी थप अनुसन्धान अघि बढाएको बताएको छ।
