काठमाडौं : नेकपा एमालेका वरिष्ठ नेता माधवकुमार नेपालले प्रधानमन्त्री तथा पार्टी अध्यक्ष केपी शर्मा ओलीविरुद्ध भण्डाफोर गर्नका लागि आफ्ना कार्यकर्तालाई निर्देशन दिएका छन्।
नेपाल-खनाल समूहद्वारा आयोजित राष्ट्रिय भेलालाई सम्बोधन गर्दै उनले भने, ‘ओलीविरुद्धको भण्डाफोरमा लाग्नुहोस्, आवश्यक परेको खण्डमा पद त्याग गर्नका लागि तयार रहनुहोस्।’
नेपाले पार्टीमा ओलीले धेरै भ्रम सिर्जना गरेको भन्दै नेता कार्यकर्ता लडाउन र भिडाउने काम हुन सक्ने भएकाले सोही अनुसार सचेत हुन पनि आग्रह गरेका छन् । ‘लडाउने भिडाउने काम हुनसक्छ तपाईहरु सबै हिसाबले तयार रहनुहोला’, नेता नेपालको भनाइ छ ।
उनले कम्युनिस्ट आन्दोलनमा लागेका नेताहरू अझैपनि कम्युनिस्ट आन्दोलनप्रति कटिबद्ध रहेको भन्दै ती नेताहरू आज पनि एकताकै पक्षमा रहेको बताए ।
उनले पार्टी विभाजनको पक्षमा नभएको समेत स्पष्ट पारे। उनले भने, ‘हामी विभाजनको पक्षमा छैनौँ, एकताकै पक्षमा छौँ। उहाँले निकाल्न खोजेपनि हामी अन्तिमसम्म लड्न तयार छौँ।’
नेपालले ओलीसँग कमिटीको सामना गर्ने आँट नरहेकाले उनी वैधानिक रूपमा अगाडि बढ्न नचाहेको बताए । ‘हामी चुनौती दिन चाहन्छौ बैठक बोलाउन त्यहाँ सामना गरौंला’, नेपालले ओलीलाई चुनौती दिए ।
प्रतिक्रिया लेख्नुहोस् :