पोखरा ।
गण्डकी प्रदेश सभाका सांसद विन्दुकुमार थापाले राष्ट्रपति विद्यादेवी भण्डारी केपी ओली गुटको रबर स्ट्याम्प बनेको आरोप लगाएका छन् । प्रतिनिधिसभा भंग गर्ने सरकारको कदम विरुद्ध नेपाली कांग्रेसले गरेको देशभरका वडा स्तरीय विरोध प्रर्दशन कार्यक्रम अन्तर्गत पोखरा महानगर ४मा आयोजित कार्यक्रमलाई सम्बोधन गर्दै उनले यस्तो आरोप लगाएका हुन् ।
सांसद थापाले संसद विघटन गर्न प्रधानमन्त्री केपी शर्मा ओलीले गरेको असंबैधानिक सिफरिस राष्ट्रपतिले रोक्नुपर्ने थियो भन्दै आक्रोस समेत पोखे । ‘राष्ट्रपति भण्डारी सिंगो देशको अभिभावक बन्नुपर्ने थियो । असंबैधानिक सिफारिस्लाई कार्यान्वयन गर्न हुने थिएन । उनले भने, ‘उहाँ देशको अभिभावक बन्न सक्नुभएन । ओली गुटको रबर स्ट्याम्प बन्दा सिंगो देशले दुख पाउने अवस्था आयो,’
संसद भंग गर्ने निर्णयले राष्ट्रलाई अनिस्चयको भूमरी तर्फ धकेलेको उनको विश्लेषण थियो । प्रधानमन्त्री ओलीले आफ्नो हुँदाखाँदाको दुईतिहाइको सरकार चुनाव गर्नका लागि नढालेको उनले टिप्पणी गरे ।
उनले ‘देश र जनताको मायाँ भएको भए, जनप्रतिनिधि मुलक संस्था प्रतिनिधिसभालाई ओलीले भंग गर्ने थिएनन’ भनेका छन् । ‘निर्वाचन गर्ने नै नियत भएको भए ओलीले आफ्नै हुँदाखादाको दुईतिहाई रहेको संसद भंग गर्ने थिएनन् । अब उनले केका आधारमा निर्वाचन गर्छन् । चुनाव गर्ने नियतले संसद भंग गरेकै होइनन् । यसलाई सर्वोच्च अदालतले सच्याउने छ । त्यसो हुन सकेन भने देश झनै अनिस्चयको भूमरीमा फस्छ,’ उनले भने ।
वाड नम्बर ४ का वडाध्यक्ष एवं कांग्रेस क्षेत्र नम्बर दुईका क्षेत्रीय सचिव शंकर वास्तोलाले प्रतिनिधिसभा भंग गर्ने असंबैधानिक कदम विरुद्ध सम्मपूर्ण नागरिक एकजुट हुनुपर्ने बताए । कार्यक्रममा विद्यार्थीको तर्फबाट देवकृष्ण पराजुली, क्षेत्रीय प्रतिनिधि राजेन्द्रनिधी कोइराला र कांग्रेस वडा सभापति गोविन्द पराजुली लगायतले संसद भंग गर्ने सरकारको निर्णय विरुद्ध अझै सशक्त आन्दोलन गनुपर्नेमा जोड दिए ।
प्रतिक्रिया लेख्नुहोस् :