पोखरा ।
विगतका वर्षहरुमा यतिबेलासम्म पोखरा र यस आसपासका बासिन्दा धेरै महोत्सवमा सरिक भइसकेका हुन्थे । कतिपय उस्तै प्रकृतिका महोत्सव, उस्तै प्रकृतिका नाचगान र कलाकारका कुरा सुन्दा नयाँपन नभएको टिप्पणी हुन्थ्यो । एउटै प्रकृतिका महोत्सव धेरै नगरेपनि हुनेथियो भन्ने नै परेको थियो । जेजसो भएपनि ति महोत्सवले अर्थतन्त्र चलायमान गराएका थिए र चिसो मौसमलाई तताईरहेका थिए । तर, यसपाली कतै महोत्सव भइदिए हुन्थ्यो भन्ने भावना सबैमा पलाएको छ । कोरोना कहरका बीचमा पनि पोखरामा केही महोत्सव भने हुनेभएका छन् । अंग्रेजी नयाँ वर्षको अवसरमा विगतमा जस्तै यस वर्षपनि रेवान पोखराले सहडक महोत्सव मनाउने भएको छ । विगतमा पाँच दिन हुने सडक महोत्सव यस वर्ष तीन दिन हुने भएको छ ।
पछिल्ला वर्षमा पोखरामा हुने सबै भन्दा फरक र ज्ञानगुन बाँड्ने अनि साहित्य, राजनीतिको समिक्षाका साथै भावी दिनहरुको समेत दिशानिर्देश गर्ने अर्को एउटा महोत्सव ‘लिटरेचर फेस्टिबल’ले यस वर्षपनि निरन्तरता पाउने भएको छ । यस वर्षको संस्करण महिला, लैङ्गिक तथा यौनिक अल्पसंख्यक र युवा वक्तालाई राजनीति, साहित्य एवमं समाजका अन्य पाटासँग जोडेर भर्चुवल माध्यमबाट हुने भएको हो । महोत्सवका निर्देशकलाई अजित बरालका अनुसार यस पालिको संस्करण पहिलाका संस्करण भन्दा धेरै फरक हुने छ । वक्तामा धेरै युवा समेटिने छन् । आयोजक बुकवर्मले यस संस्करण कोभिड महामारीलाई ध्यानमा राख्दै भर्चुअल माध्यमबाट गर्ने तयारी गरेको छ । निर्देशक बरालले अहिले युवालाई प्राथमिकता दिएर भर्चुवल माध्यमबाट महोत्सव गर्ने जानकारी दिए ।
यसवर्ष धेरै पृथक तरिकाले आयोजना महोत्सव आयोजना गरिने बरालको भनाइ छ । शनिबार महोत्सवका बारेमा जानकारी दिन आयोजित पत्रकार भेटघाट कार्यक्रममा उनले लेखकलाई पाठकसँग ‘कनेक्ट’ गराउन महोत्सव प्रभावकारी भएको र महोत्सव विचार उत्पादनको थलो बनेको बताए ।
पोखरालाई साहित्यिक पर्यटनको सहरका रुपमा चिनाएको नेपाल लिटरेचर फेस्टिबल यही पुसको १४ र १५ गते आयोजना गरिँदैछ । पुस १३ मा फेस्टिबलको शुभारम्भ साँझ हुनेछ । उक्त साँझमा प्रदिप रोदनसँग अमृत सुवेदीको मेहफिल कार्यक्रम हुनेछ । यस वर्ष भने कोरोनाका कारण महोत्सव२ दिनमात्र आयोजना हुनेछ ।
२०११ मा काठमाडौंमा सुरु भएको महोत्सव २०१६ देखि पोखरामा हुँदै आएको छ । यसअघिका संस्करण लेकसाइडमा हुने गरेकोमा यस संस्करण सराङकोटमा आयोजना हुने छ । सर्वसाधारणको उपस्थिति बिना आयोजक पक्ष सराङकोटमा रहने र भर्चुअल रुपमा महोत्सव चलाइने महोत्सवका कार्यकारी निर्देशन नीरज भारीले बताए ।
आयोजक पक्षकै र्याण्डम रिडर्स कर्नरका अध्यक्ष केशव शरण लामिछानेले पोखरालाई साहित्य जात्राका सहरमा चिनाउन लागिएको बताए । महोत्सवले पोखरालाई पर्यटकीय सहरको मात्र नभई साहित्य जात्राको सहरका रुपमा स्थापित गर्न सहयोग पुगेको उनको भनाइ थियो ।
फेस्टिभलको यो संस्करणमा १६ सेसन र ४० जनाभन्दा बढी वक्ता रहनेछन् । सबै सत्रहरू भर्चुअल रूपमा गरिने भएकाले यस पटक दर्शकको उपस्थिति भने रहनेछैन । फेस्टिभलका सबै सत्र सामाजिक सञ्जाल एवम् फेस्टिभलको आधिकारिक युट्युब च्यानलबाट लाइभ प्रसारण हुनेछन् । नवौं संस्करणको फेस्टिभलमा साहित्यकार, लेखक, पत्रकार, कलाकार र विशिष्ट व्यक्तित्व वक्ताका रूपमा रहनेछन् ।
यस संस्करणमा उद्योग वाणिज्य संघका नवनिर्वाचित वरिष्ठ उपाध्यक्ष चन्द्र ढकाल, राजकुमार बानियाँ, निश्चल बस्नेत, आयुसी केसी, गण्डकी प्रदेशका मुख्यमन्त्री पृथ्वीसुब्बा गुरुङ, मन्त्री किरण गुरुङ, यज्ञश, निरन्जन कुँवरलगायत वक्ता उपस्थित हुनेछन् ।
प्रतिक्रिया लेख्नुहोस् :