काठमाडौं ।
सभामुख अग्नि सापकोटाविरुद्ध परेको मुद्दामा आज सुनुवाइ नहुने भएको छ । मुद्दाको सुनुवाइमा पालो नआएपछि आज सुनुवाइ नहुने भएको हो । प्रधानन्यायाधीश चालेन्द्र शमसेर जबरा, दीपककुमार कार्की, मीरा खड्का, हरिकृष्ण कार्की र विश्वम्भरप्रसाद श्रेष्ठको संवैधानिक इजलासमा सापकोटाको मुद्दाको पेसी तोकिएको थियो ।
यसअघि गएको वर्ष २०७६ सालको फागुन ३० गते सभामुख सापकोटाको मुद्दामा पेसी तोकिएको भए पनि हेर्न नभ्याइएपछि सुनुवाइ सरेको थियो । त्यसबीचमा लकडाउन भएसँगै अदालत बन्द हुँदा यो मुद्दालाई अघि बढाउन सकिएको थिएन । सभामुख सापकोटामाथि काभ्रेका अर्जुन लामाको हत्यामा संलग्न भएको आरोप लागेको छ ।
२०६२ सालको वैशाख १६ गते श्रीकृष्ण मावी दाप्चामा अभिभावक भेला भएको ठाउँबाट लामालाई अपहरण गरेर खाल्डो खन्न लगाएर ज्युँदै पुरेको भन्दै लामाकी पत्नी पूर्णिमायाले २०६४ सालमा जाहेरी दिएकी थिइन् । घटनाको जाहेरी प्रहरीले लिन नमानेपछि उनले २०६९ सालमा सर्वोच्च अदालतमा मुद्दा दर्ता गराएकी हुन् ।
त्यसबेला सापकोटा सूचना तथा सञ्चारमन्त्री थिए।
सभामुख सापकोटाले भने आफूविरूद्धको मुद्दालाई द्वन्द्वकालीन मुद्दाको रूपमा हेरिनुपर्ने भन्दै आरोप अस्वीकार गर्दै आएका छन् ।
प्रतिक्रिया लेख्नुहोस् :