पोखरा, १ पुस ।
नेपाली कांग्रेसका नेता अर्जुन नरसिंह केसीले कांग्रेसमा अहिले अस्थायी खालको नेतृत्व चयन गरेर आन्दोलनमा जुट्नुपर्ने प्रस्ताव गरेका छन् । पोखरामा प्रेस युनियनले गरेको पत्रकार भेटघाट कार्यक्रममा बोल्दै उनले यस्तो प्रस्ताव गरेका हुन् ।
मंगलबार आएको अध्यादेश लोकतन्त्र माथिकै प्रहार भएकाले यसविरुद्ध लड्नुपर्ने उनको ठहर छ । यो बेला नेपाली कांग्रेस एक आपसमा अल्झिनुभन्दा एकढिक्का भएर सरकारको कदम विरुद्ध लाग्नुपर्ने उनले धारणा राखे । अध्यादेशलाई उनले ‘घोर अप्रजातान्त्रिक, निन्दनीय, लोकतन्त्रका आधारभूत संस्थाहरुलाई ध्वस्त पार्ने र सम्पूर्ण रुपमा पद्धत्तिलाई सर्वसत्तावाद उन्मुख गर्ने प्रयास’ भनेका छन् ।
‘नेपाली कांग्रेस अहिले आफ्नो महाधिवेशनको तयारीमा छ । यो बेला यता केन्द्रित हुने अवस्था रहेन । सरकारले लोकतान्त्रिक मुल्य मान्यता सबै ध्वस्त पा¥यो । त्यसका विरुद्ध लड्न महाधिवेशन भन्दापनि अब आन्दोलन केन्द्रित गर्नुपर्ने भएकाले अन्तरिम नेतृत्व चयन गरौं भन्ने मेरो प्रस्ताव छ ।
यो प्रस्ताव म पार्टीको केन्द्रीय कार्यसमितिमा राख्छु’ उनले भने । पार्टीको विधान र बैधानिकतालाई ध्यान दिँदै अस्थाई खालको नेतृत्व चुन्नु पर्नेमा उनको जोड थियो ।
प्रतिक्रिया लेख्नुहोस् :