पोखरा ।
फेवा जलाधार क्षेत्रलाइ समेटेर संरक्षित फेवा जलाधार क्षेत्र घोषणा गर्ने तयारी अगाडि बढेको छ । भू तथा जलाधार संरक्षण समिति कास्की सदस्य सचिव तथा बृहत जलाधार व्यवस्थापन केन्द्र गण्डकीका प्रमुख रामसिंह थापाले ताल जोगाउने नेपाल सरकारको प्रतिवद्धता अनुरुप पानी ढलो क्षेत्रलाइृ समेटेर संरक्षित फेवा जलाधार क्षेत्र घोषणा गर्न लागेको जानकारी दिएका हुन् ।
समितिले संरक्षित फेवा जलाधार क्षेत्र घोषणाको तयारीको क्रममा बिहीबार सरोकारवालासंग गरेको कार्यक्रममा उनले कुनैपनि निकायलको एकल प्रयासबाट ताल जोगाउन नसकिने तर्क गरे । ‘फेवाताल संरक्षण एवं बहुउपायोगका लागि अल्पकाल र दीर्घकालमा गर्नुपर्ने प्रमुख कार्यसहितको एकीकृत व्यवस्थापकीय योजना आवश्यक छ ।’ उनले भने, ‘ राष्ट्रिय गौरवको आयोजनाको रुपमा प्रथम, दोस्रो, र तेस्रो चरणमा गर्नुपर्ने कार्यसूची बनाई सम्बन्धित निकायबाट प्रस्ताव गरी कार्यान्वयनमा लैजान सकिन्छ ।’
समितिका संयोजक तथा जिल्ला समन्वय समिति कास्कीका प्रमुख बैनबहादुर अधिकारी क्षेत्रीले विगतमा फेवा जलाधार आयोजना, सामुदायिक विकास तथा वन संरक्षण आयोजना, हरियो वन कार्यक्रम, पञ्चासे संरक्षित वन क्षेत्र, जाइका लगायतले फेवाताल जोगाउनका लागि कार्यक्रम गरेको बताए । साना टुक्रे योजनाको कामले प्रभावकारी काम हुन नसकेको उल्लख गर्दै उनले फेवा एकीकृत भू तथा जलाधार योजना आवश्यक रहेको धारणा राखे ।
समितिले बिहीबार पोखरा महानगरपालिका वडा नम्बर १ देखि ८ वडा, वडा नम्बर १७ र २२ नम्बर वडाका जनप्रतिनिधि, राजनीतिक दलका प्रतिनिधिसंग तीन चरणमा राय सुझाव लिएको थियो । समन्वय प्रमुख क्षेत्रीले जलाधार क्षेत्रको १२३ वर्गकिलोमिटर क्षेत्रफलको एक लाख ४६ हजार ८६४ जनसंख्याको प्रतिनिधित्व हुनेगरि ११ स्थानमा कार्यक्रम गरेर सुझाव लिएको जानकारी दिए ।
फेवातालको चार किल्ला निर्धारण, सिमांकन तथा नक्सांकन समितिका संयोजक पुण्यप्रसाद पौडेलले सिमांकन भित्र दर्ता भएका जग्गा खारेज गर्ने बताए । मापदण्ड भित्र परेर दर्ता भएका जग्गाको क्षतिपूर्ति दिइने भएपनि दर्ता नभएका जग्गा खारेज हुने उनले जानकारी दिए ।
कार्यक्रममा जिल्ला समन्वय अधिकारी नवराज बराल, जलाधार संरक्षण विज्ञ विष्णुप्रसाद पोखरेल, नेकपा कास्कीका विजया सुवेदी, जनता समाजवादी कास्कीका अध्यक्ष गिरीप्रसाद गुरुङ, रष्ट्रिय जनमोर्चा कास्कीका अध्यक्ष चन्द्रबहादुर केसी, राप्रपा कासकीका प्रतिनिधि सिता खड्का, पोखरा महानगरपालिका वडा नम्बर १, २, ३ र १७का वडाध्यक्षहरु क्रमस शारदाकुमारी पराजुली, रामेश्वर मलल, रविन्द्रबहादुर प्रजु र तीर्थराज अधिकारी, पोखरा २२का जनप्रतिनिधि मातृका प्रसाद बराल लगायतले फेवाताल संरक्षणका विषयमा बोलेका थिए ।
प्रतिक्रिया लेख्नुहोस् :