काठमाडौं ।
नेपाल कम्युनिष्ट पार्टी (नेकपा) को मंगलबार सम्पन्न बैठकमा प्रधानमन्त्री एवं अध्यक्ष केपी शर्मा ओली र कार्यकारी अध्यक्ष प्रचण्ड बीच भनाभन भएको छ ।
नेकपाका एक सचिवालय सदस्यका अनुसार प्रधानमन्त्री ओलीले ‘आरोपयुक्त प्रस्ताव माथि छलफल हुन सक्दैन, फिर्ता हुनुपर्छ’ भनेपछि प्रचण्डले ‘तपाईं को हो, मैले ल्याएको प्रस्ताव फिर्ता हुनुपर्छ, छलफल हुँदैन भन्ने ?’ भन्दै भनाभन गरेका हुन्। प्रचण्डले आफ्नो पत्र र राजनीतिक प्रस्तावको मूल्यांकन गर्ने अधिकार पार्टी बैठकलाई भएको बताएका छन्।
प्रचण्डले कर्णाली प्रकरण, वीरगञ्ज प्रकरण र भारतीय खुफिया एजेन्सी रअका प्रमुखसँगको भेटघाट प्रकरणलाई आफ्नो प्रस्तावमा उठाएका थिए।
ती प्रकरणबारे छलफल गर्न बैठकको माग गर्दा समेत बैठकका लागि तयार नभएपछि आफूसहित सचिवालयका पाँच जना नेताहरूले पत्र लेखेको प्रचण्डले बताएका थिए।
पाँच नेताको पत्रको जवाफमा लाञ्छना लगाएर जवाफ पठाइएको र त्यो पत्र सामाजिक सञ्जालमा समेत पठाइएको प्रचण्डले बताएका थिए। ‘त्यो घोचपेचको जवाफ तपाईंले सामाजिक सञ्जालमा सार्वजनिक गर्ने अनि हाम्रा घर घरमा पठाउने गरेपछि मात्रै मैले पनि पत्र लेखेको हो। मैले केही बिगारेको छैन,’ प्रचण्डको भनाई उदृत गर्दै ति सदस्यले भने, ‘मैले जे देखे सबै लेखेको छु। यो तपाईंले भन्ने कुरा होइन बैठकले भन्ने कुरा हो।’
प्रधानमन्त्री निवास बालुवाटारमा मंगलबार बसेको बैठकमा अध्यक्ष ओली र दाहालले आ–आफ्नो धारणा राखेको र अन्य सदस्यहरूले छोटो रूपमा सामान्य धारणा राखेको प्रवक्ता नारायणकाजी श्रेष्ठले जानकारी दिए ।
उनले अब नेकपाका नेताहरूबीच औपचारिक र अनौपचारिक दुवै तहमा छलफल हुँदै जाने बताए । उनका अनुसार बैठक बुधबार १ बजे पुनः बस्ने छ ।
प्रतिक्रिया लेख्नुहोस् :