गण्डकीमा थप ५ कोरोना संक्रमितको मृत्यु

पोखरा ।
गण्डकी प्रदेशमा सोमबार ५ कोरोना संक्रमितको मृत्यु भएको छ ।

मृत्यु हुनेमध्य ४ संक्रमित पोखरा र १ संक्रमित स्याङ्जाका रहेको स्वास्थ्य निर्देशनालय गण्डकीले जानकारी दिएको छ ।

मृत्यु हुनेमा पोखरा महानगर–१३ का ७८ वर्षीय महिला, पोखरा महानगर– १८ का पुरुष, पोखरा महानगर– ३ का ६५ वर्षीय पुरुष र पोखरा महानगर–१६ का ५७ वर्षीय महिला छन् ।

त्यस्तै स्याङ्जा वालिङ नगरपालिका– १४ का ६७ वर्षीय कोरोना संक्रमित पुरुषको मृत्यु भएको निर्देशनालयले जनाएको छ ।

कोरोना संक्रमणका कारण हालसम्म गण्डकीमा मृत्यु हुनेको संख्या १५९ पुगेको छ । प्रदेशभर कोरोना संक्रमण हुनेको संख्या १२ हजार ५८ रहेको सरकारी तथ्याङक छ ।