पोखरा ।
नेपाल कम्युनिष्ट पार्टी (नेकपा)को सचिवालय बैठक आज बस्दै छ । बैठकमा पहिलो पटक दुई अध्यक्षका अलग-अलग प्रस्ताव पेश हुँदैछ । यस अघि ३ मंसिरमा बसेको सचिवालय बैठकमा प्रधानमन्त्री ओलीले आफूलाई दस दिन चाहिने बताएका थिए। त्यही अनुरुप प्रधानमन्त्री एवम् नेकपा अध्यक्ष केपी शर्मा ओलीले शनिबारको सचिवालय बैठकमा पेश गर्ने प्रस्ताव तयार परेका छन्। २८ कात्तिकको सचिवालय बैठकमा नेकपा प्रचण्डले १९ पृष्ठ लामो राजनीतिक प्रतिवेदन पेश गरेका थिए। प्रधानमन्त्री पक्षधर नेताहरूले यसलाई आरोपपत्र भनेका छन्।
प्रचण्डले राजनीतिक रूपमा लगाएको आरोपको जवाफ दिने र फौजदारी आरोप प्रमाणित गर्न चुनौती दिने तयारी प्रधानमन्त्रीको रहेको उनी निकट स्रोतले बताएको छ । ‘राजनीतिक रूपमा लगाएको आरोपलाई प्रधानमन्त्रीले राजनीतिक रूपमै जवाफ दिनुहुन्छ। जुन आरोप फौजदारी छन्, त्यसको राजनीतिक छलफल गरेर हुँदैन’ प्रधानमन्त्री निकट स्रोतले भन्यो, ‘तैंले भ्रष्टाचार गरिस्, यो गरिस्, त्यो गरिस् भनेर हुने होइन। भ्रष्टाचारबारे त्यहाँ छलफल गरेर हुने नै होइन। न्यायालयको न्यायाधीशलाई बोलाएर यसो गरिस्, त्यसो गरिस् भनेर त्यहाँबाट भन्ने कुरा पनि होइन। फौजदारी कुराको कानुनी बाटोबाट जानुपर्छ। कि प्रमाणित गर्न पर्यो, होइन भने यसमा माफी माग्नु पर्यो वा आफू कारबाही हुन पर्यो।’
स्रोतका अनुसार प्रधानमन्त्रीले प्रतिवेदनमा भ्रष्टाचार प्रमाणित गरे आफू जेल बस्न तयार रहेको समेत चेतावनी दिएका छन्। त्यस्तै समाजवाद भनेको परिवार पोस्ने नरहेको भनेर पनि प्रतिवेदनमा ओलीले उल्लेख गरेका छन्।
‘संघीयता विरोधी भनेर लगाएको आरोपको त्यही जवाफ दिइएको छ। समाजवादी कार्यक्रम भएन भन्ने कुराको पनि यसकारणले समाजवादी हो भनेर भनिएको छ,’ प्रधानमन्त्री निकट स्रोतले भन्यो, ‘तपाईंमा परिवारवाद छ, बुहारी मन्त्री, छोरी मेयर, भतिजो राजदूत बनाउनु समाजवाद होइन भनेर प्रचण्डलाई जवाफ दिइएको छ। हुरीले उडाएका जनताको घरमा छाना हाल्ने, जनता आवास कार्यक्रम नै समाजवाद हो भनेर भनिएको छ।’
प्रधानमन्त्रीका प्रेस सल्लाहकार थापाले प्रधानमन्त्रीमाथि लगाइएका आरोपको तथ्यसहित जवाफ आउने बताए। नेकपाको ३ मंसिर पछिको यो १० दिनको अबधिलाई प्रधानमन्त्री एवं पार्टी अध्यक्ष केपी शर्मा ओली र प्रचण्ड नेपाल पक्षले एक अर्का विरुद्ध दबाबमा राख्ने रणनीतिमै केन्द्रित गरे । यो अबधिमा पार्टीका दुई अध्यक्ष बीचमा एक एक पटकपनि भेटघाट वा कुराकानी भएको छैन । प्रधानमन्त्री ओलीको तर्फबाट उहाँका निकट नेताहरुले शुक्रबार कार्यकारी अध्यक्ष प्रचण्ड, वरिष्ट नेता माधवकुमार नेपाल र उपाध्यक्ष बामदेव गौतमलाई छुट्टाछुट्टै भेटघाट गर्दै अलग-अलग रुपमा प्रस्ताव समेत राखेका थिए ।
प्रतिक्रिया लेख्नुहोस् :