पोखरा, २ मंसिर ।
नेपाल र बंगलादेश बीचको दास्रो मैत्रीपूर्ण फुटबल प्रतियोगिता आज (मंगलबार) हुँदैछ । यस अगाडि शुक्रबार भएको पहिलो मैत्रीपूर्ण खेलमा नेपाल २–० गोल अन्तरले पराजित भएको थियो । बंगलादेशलाई मैत्रीपूर्ण सिरिज ट्रफी उचाल्न बराबरी नै काफी छ । नेपाललाई सिरिज बराबरी गर्न जित नै चाहिन्छ ।
नेपालले अन्तिम खेलका लागि शेख जमल धनमुण्डी मैदानमा प्रशिक्षण गरेको छ । नेपाली फुटबल टोलीका प्रशिक्षक बालगोपाल महर्जनले पहिलो खेलमा व्यहोरेको हारलाई मध्यनजर गर्दै प्रशिक्षण भइरहेको जानकारी दिएका छन् ।
पहिलो खेलमा भएका कमी कमजोरीलाई सच्याउने गरी दोस्रो खेलको तयारीमा आफूहरु रहेको उनले बताए । कोभिड–१९ का कारण अभ्यासमा पर्याप्त नभएकाले पहिलो खेलमा पराजित हुनुपरेको उनले बताए ।
नेपाली टिमले मंगलबार सुधारिएको प्रदर्शन गर्ने प्रशिक्षक महर्जनले दाबी गरेका छन् । सन् २०१५ मा सम्पन्न मैत्रीपूर्ण खेलमा बंगलादेशले नेपाललाई १–० ले हराएको थियो ।
सन् २०१८ मा नेपालले बंगलादेशमै सम्पन्न साफ च्याम्पियनसिप प्रतियोगितामा २–० को जित निकालेको थियो ।
प्रतिक्रिया लेख्नुहोस् :