पोखरा, २९ कर्तिक ।
नेपाली कांग्रेसका सहमहामन्त्री डा.प्रकाश शरण महतले वर्तमान सरकारले अराजकता, बेइमानी र कुशासनलाई बढवा दिएको आरोप लगाएका छन् । शनिबार पोखरामा नेपाली कांग्रेसका केन्द्रीय आमन्त्रीत सदस्य एवं सांसद स्वर्गीय सूर्यबहादुर केसीको १३ औं पुण्य तिथिमा कांग्रेस कास्कीले आयोजना गरेको श्रद्धाञ्जली सभामा बोल्दै उनले यस्तो आरोप लगाएका हुन् ।
सहमहामन्त्री डा. महतले लामो लकडाउन, निषेधाज्ञा र अन्य परिस्थितिले ठूलो जनसंख्या रहत र सहयोगको पर्खाइमा रहेपनि सरकारले त्यस तर्फ ध्यान नदिएको बताए । सरकारले देशको अर्थतन्त्रलाई मजबुद पार्नुको सट्टा झन धरासायी बनाएको उनको टिप्पणी छ ।
स्वर्गीय नेता सूर्यबहादुर केसी नेपाली कांग्रेसमा आएकाले कांग्रेसको प्रतिष्ठा बढेको र उनलाई कांग्रेसले पहिले नै पार्टीमा ल्याउन चाहेको उनले स्मरण गरे । आफू उर्जामन्त्री हुँदा स्वर्गीय केसीसंग जलविद्युतको विकासका विषयमा कुराकानी भएको र पछिल्ला दिनमा पनि भएको भेटमा विकासको चिन्ता स्वर्गीय केसीले लिने गरेको उनले बताए ।
कास्की कांग्रेसका नेता शुक्रराज शर्माले स्वर्गीय केसीले अंगालेको राजनीतिक यात्रा अंगाल्न उनका परिवारजनमा आग्रह गरे । कांग्रेका आमन्त्रित केन्दीय सदस्य एवं गण्डकी प्रदेशका सांसद कुमार खड्काले केसीको निधनले सिंगो पोखराको समाजिक र सत्कार्यको दीप निभेको टिप्पणी गरे ।
कार्यक्रममा पूर्वमन्त्री यज्ञबहादुर थापा, प्रदेश सांसद विन्दुकुमार थापा, नेता सोभियतबहादुर अधिकारी, कांग्रेस क्षेत्र नम्बर २का सभापती माधव प्रसाद बास्तोला, पूर्व सांसद शरदा पौडेल, क्षेत्री समाजका केन्द्रीय उपाध्यक्ष कृष्णबहादुर थापा, कांग्रेस पोखरा ७ का सभापति नवीन बराल लगायतले स्वग्रीय केसीले राजनीतिक, औद्योगिक र सामाजिक क्षेत्रमा दिएको योगदानको विषयमा चर्चा गरे । कांग्रेस कास्कीका सभापति कृष्ण केसीको सभापतित्वमा सम्पन्न कार्यक्रममा परिवारको तर्फबाट सहभागीलाई पूर्व एसएसपी कृष्णबहादुर थापाले धन्यवाद दिएका थिए ।
विक्रम संवत २०१४ जेठ १४ मा जन्मिएका सूर्यबहादुर केसीको मधुमेह, उच्च रक्तचाप समस्याका कारण गत कार्तिक १७ गते राती निधन भएको थियो । कार्यक्रममा बोधराज कार्कीले स्वर्गीय केसीको जीवनीको बारेमा जानकारी दिएका थिए । श्रद्धाञ्जली कार्यक्रम स्वर्गीय सूर्यबहादुर केसीकै मुस्ताङचोक स्थित निवासमा भएको हो ।
प्रतिक्रिया लेख्नुहोस् :