पोखरा ।
नेपाल आयल निगमले गण्डकी प्रदेशमा इन्धन क्षमता विस्तार आयोजना सुरु गरेको छ ।
निगमले क्षमता विस्तारको पहिलो चरण अन्तर्गत गण्डकी प्रादेशिक डिपोमा भण्डारण गृह निमार्णको सुरु गरेको हो । आयोजनाको बिहीवार उद्योग वाणिज्य तथा आपूर्तिमन्त्री लेखराज भट्टले शिलान्यास गरे ।
शिलन्यास कार्याक्रममा बोल्दै भट्टले सरकारले केही गरेन भन्नेलाई सरकारले काम गरेर जवाफ दिने बताए । हरेक प्रदेशमा ९० दिनका लागि इन्धन भण्डारण क्षमता विस्तार गर्ने नेपाल सरकारको नीति अनुसार गण्डकी प्रदेशबाट इन्धन भण्डारण गृहको निमार्ण प्रारम्भ भएको छ ।
गण्डकी प्रदेश डिपोमा १ करोड लिटर क्षमताको डिपोको निर्माण हुने नेपाल आयल निगमका कार्यकारी निर्देशक सुरेन्द्रकुमार पौडेलले जानकारी दिए । निर्माणाधिन डिपोमा ५० /५० लाख लिटर भण्डारण क्षमताका २ वटा ट्यांकी निर्माण हुन लागेका हुन् ।
पोखरा २९ र ३० मा गगनगौडामा पर्ने नेपाल आयल निगमको डिपो रहेको स्थानमा थप भण्डारण क्षमताको गृह निमार्ण गर्न लागिएको हो ।
हाल गण्डकी प्रादेशिक डिपोमा २२ लाख लिटर ८० हजार डिजेल र ३ लाख ५० हजार लिटर पेट्रोल भण्डारण क्षमता रहेको छ ।
अब डिपोमा थप ५० लाख लिटरको क्षमताका दुइवटा ठुला डिजेल भण्डार ट्याङ्क बन्ने नेपाल आयल निगम संचालक समितिका अध्यक्ष तथा वाणिज्य तथा आपूर्ति मन्त्रालयका सचिव डा.बैकुण्ठ ढकालले बताए ।
गण्डकी प्रदेशमा हालको भण्डारले पेट्रोल २ दिन र डिजल ७ दिन धान्न सक्छ । नयाँ मण्डार गृह बनेपछि ३० दिनको लागि डिजेल र १२ दिनको लागि डिजेलको भण्डारण क्षमता बृद्धि हुने निगमको भनाई छ ।
आयोजना सम्मपन्न हुदाँको बखत यो अमलेखगञ्ज पछिको दोस्रो भण्डारण गृह बन्ने छ ।
जर्मन प्रविधिमा आधारित भई निर्माण हुने यो डिपो पूर्ण अटोमेटेड हुनेछ । डिपोमा अत्याधुनिक सुरक्षा उपकरण तथा आगलागी नियन्त्रणका लागि विशेष यन्त्र जडान गरिने निगमले जनाएको छ ।
नयाँ डिपो बनेपछि कुल १ करोड २६ लाख ३० हजार किलोलिटर पेट्रोलियम पदार्थ भण्डारण गर्ने क्षमता प्रादेशिक डिपोमा हुने छ । आयोजना निर्माणको लागि नेपाली र भारतीय कम्पनी, रिलि गियर तथा भारतीय कम्पनी भारत ट्यांकले उक्त डिपो निर्माणको टेन्डर पाएका छन् । ठेकेदारले २ वर्ष भित्र निर्माण सम्पन्न गर्ने छ ।
डिपो निर्माणका लागि भ्याटबाहेक कुल ७७ करोड ७७ लाख रुपैंयाको लाग्ने छ ।
प्रतिक्रिया लेख्नुहोस् :