पोखरा, २५ कार्तिक ।
पोखरा महानगरका सडक बलियो र राम्रो बनाउन अहिले अमेरिकी प्रविधिको अस्फाल्ट कंक्रिटिङ गर्ने काम धमाधम भइरहेको छ ।महानगरको न्युरोडमा कंक्रिटिङको काम सकिएको छ । मंगलबारबाट लेकसाइडमा कंक्रिटिङ गर्ने कामको प्रारम्भ भएको छ ।
पोखरा महानगरपालिका र गण्डकी प्रदेश सरकारबाट अलग अलग ठेक्का लिएर इलाइट मोतीधन जेभीले काम धमाधम बढाइरहेको हो । सो कम्पनीका कन्ट्रयाक म्यानेजर राजु रानाभाटका अनुसार काम निरन्तर गर्ने वातावरण बने अबको तीन महिना भित्र पोखराको मुख्य सडकमा अस्फाल्ट कंक्रिटिङको काम सकिइसक्ने छ ।
लेकसाईडको हल्लन चोकमा कंक्रिटिङको काम गण्डकी प्रदेश सरकारका भौतिक पूर्वाधार मन्त्री रामशरण महतले प्रारम्भ गरेलगत्तै प्रदेश सांसद राजिव पहारीसंग अनौपचारिक ढंगले निर्माण कम्पनीका रानाभाट भन्दै थिए, ‘अबको तीन महिना भित्र सबैको साथ पाएर काम निरन्तर गर्न पाए सबैकाम सकिन्छ । सुन्दर पोखरामा सुन्दर सडक बनाउन भनेर अन्यत्रको कामलाई बरु केही थाँती राखेरै भएपनि प्राथमिकतामा राखेका छौं ।’
त्यस अगाडि मन्त्री बस्नेतले नरिवल फोड्दै आलोचना आउने गरी काम नगर्न निर्माण कम्पनीलाई आग्रह गरेका थिए । उक्त कार्यक्रममै गण्डकी प्रदेश सांसद पहारीले अब बिकासको लहर आएको बताउदै लेकसाईडमा ७० लाखमा फुटट्यक समेत बन्ने जानकारी दिएका थिए।
पोखरा महानगरकोे १७ करोड लगानीमा १२ किलोमिटर बाटो निर्मार्ण न्युरोडबाट अगाडि बढेको छ । अब महेन्द्रपुलदेखि सिद्धार्थचोक, मेन्द्रपुल देखि रानीपौवा हुँदै अम्मरसिंह चोक, महेन्द्रपुल देखि पालिखेचोक हुँदै केआई सिंह पुल र सुन्दर फिडसम्मको बाटो अस्फाल्ट कंक्रिटिङ हुने महानगरका योजना महाशाखा प्रमुख ई.शारदामोहन काफ्लेले जानकारी दिए ।
यता पूर्वाधार विकास कार्यालय कास्कीका प्रमुख, इन्जिनियर दीनेश कुमार घिमिरेका अनुसार मुस्ताङचोकदेखि राष्ट्रवैंकचोक, शहीद चोक हुँदै लेकसाइड हल्लन चोकसम्म र हल्लन चोकबाट जिरो किलोमिटरसम्म ५.६ किलोमिटर सडकलाई अस्फाल्ट कंक्रिटिङ गर्न नौ ९ करोड ७८ लाख १३हजार ६ सय ६७ रुपैयाँमा ठेक्का सम्झौता भए बमोजिम काम सुरु भएको हो ।
Discussion about this post